حموريات

                                  مشتاق يا عالم
- ويه طيور الطايرة أبعث رسايل إلكم . . يكفي سهر وبعاد . . أنطر رسايلكم ، ويه الطيور الطايرة أبعث سلام الكم ، الشوك أخذني وياه . . يمتى الولف نلكاه . . الشوكك اخذني وياه يمتى الوطن نلكاه . . اللي يحب الناس يشعل الف شمعة . .
- وي وي وي . . هاي شنو ياحمار ؟ صاير تغني لحسام الرسام . . وشنو هالشجون والحنين . . خليتني أحن لسليمة الخبازة
- اي والله فهيم افندي . . مشتاق . . مشتاق . . وخليني بقهري . . تره أنفجر بيك . . وخلي يكولون بُكره حمار فهيم افندي طلع ارهابي .
- أف أف أف على كيفك عزيزي شنو لازم عالكة عندك
- اي نعم عالكة وواصله حدها . . مشتاق للبلد ، مشتاق للأهل . . مشتاق لكل شي بالوطن .
- لك صدك انت حمار . . ولك شناقصك هنا ؟ . . اشو دتاكل أحسن بتزا شعير ، ودتزقنب أحسن ( كاندي ) نخالة خالي من الكولسترول ، وعمك هاربر ما مقصر وياك . . تمام ياخذ منك شوية تاكسات . . وهذا ممكن تعتبره زكاة تدخل بيه الجنة . . لو تريد بس تلغف ؟
- تمام تمام ، لكن هنا ماعندي صديق حميم . . ولا عندي أهل . . وكافي تره رح أبجي وأغركك شلالات نياكرا
- يلله طول بالك كلنا بالهوا سوه . . روح جرلك راس تتن وعدل هالصماخ وكلشي ينحل . . واذا عالأهل . . آني أهلك . . يمعود . . بس لاتنقهر
- أي لا . . والله والنعم . . بس لو شوية متنكنك ( من النق ) ! ، بس والله فهيم افندي مشتاق . . لك مشتاق ياعالم .